[88] Oras para sa Ehersisyo

Pagkatapos ng mainit na talakayan sa politika kasama si Coolwaterworks at usaping buhay OFW/Domestic Helper sa nito ko lang na entry ay usaping pang fitness naman tayo.

Napansin ko kasi na may mga nagtatanong na sa akin ng personal tungkol sa mga diet at ehersisyo. Aba e nagugulat naman ako. Bakit kanyo? E kasi ang Dioniscio nyo ay hindi naman Nutritionist o Fitness instructor. Ang payo ko ay sa Professional talaga tayo magtanong. O huwag sasama ang loob ha. Ako naman ay handang makinig at mag-share pa rin sa abot ng sapat na kaalaman ko. Kaya kapag alam ko e di sasagutin yan ng inyong lingkod. Ako naman ay mahal ko kayong lahat ano!

O heto nga’t may nagtanong na ano daw ba ang numero unong rason kung bakit hindi makapag-work-out ang isang tao pero sa totoo ay gusto naman talagang  mag ehersisyo. Napakamot ako sa ulo at sabay hirit, “Gusto ba talaga? Talagang-talaga?” Noon kasi tinanong ko na ang sarili tungkol diyan.

*Motivation ba ang kulang sa akin? Kasi kahit gusto ko puedeng kulang pa ako sa motivation o yung drive ko to pursue fitness. Tama?

*Bago ako mag ehersisyo, anu ba ang ideal na workout plan ko sa katawan ko? Ano ba ang dapat unahin? Samakatuwid, paano ba ako maguumpisa?

*At higit sa lahat, PERA. May pera ba ako pang gastos para sa lahat?

Pero napagtanto ko na ORAS pala ang kalaban ko. Bakit kanyo mag bossing? Simplehan natin ha. Kapag nakikita ko na lumalaki ang aking tiyan at walang bumabagay na damit sa akin, duon pa lang sa aspetong iyon ay motivated na agad ako. Unang tanong, “paano ako magsisimula?” Isip, isip, isip! Pinaka mabilis at matipid na paraan ay yung simpleng pagtulong sa gawing bahay, yung tamang lakad kung kaya na bang lakarin ang pauwi mula trabaho hanggang bahay. Tamang isports at diet. O di kaya ay push up/sit up o stretching pag gising sa umaga, paano? Click mo lang ito. Madaming puedeng gawin na makababawas ng timbang na hindi ka gagastos hindi ba? Sinimplihan lang naman natin. Kasi kung ano pa ang simple ay siya pang pinaka mahirap gawin!

Tanong ng Dioniscio nyo, Magagawa mo ba iyang mga simpleng bagay/gawain kung hindi ka magbibigay ng oras o di kaya/at tatamarin ka?

Tandaan mo lang ang tatlong (3) bagay na ito:

1. Kawalan ng oras ang pinaka unang balakid sa pageehersisyo.
2. Ang mga simpleng ehersisyo (tulad ng nabanggit sa taas) ay magiging epektibo para sa iyo KUNG mabibigyan mo sila ng sapat na oras araw-araw.
3. Kung ano ang sabihin at idikta ng utak at puso natin, iyan ang susundin at magiging repleksyon ng ating pangangatawan. Ha? Ano kamo? Simple. Kung tamad ka, lolobo ka.

Ngayon kung ikaw ay pursigidong mag ala darna at kapitan barbel pagdating sa tindig at kaseksihan, seek professional help. Hindi naman siguro mahirap intindihin iyan.

Hihiritan pa kita, Tandaan mo wala sa haba ng pageehersisyo o bigat ng binubuhat mo ang susi para sa maganda at masiglang pangangatawan, nasa pagbabalanse kung hanggang saan lang ang iyong kaya. Masamng pinapagod ng sobra ang katawan.

Heto naman ako sa baba nuong naguumpisa pa lang sa pag eehersisyo.